بخـــاف
كل أما اشوف عمري جري بيا ……… بخاف
كل أما تدبل وردتي فيا ……………. بخاف
حتى في كلامي حتى في غنايا
بتبان آلامي بيبان بكايا
حتى أما بفرح
بخاف لتفوت الفرحة
بخاف م الدنيا الجارحة
بخاف ل الضحكة الحلوة
تبقى جناين أحزان طارحة
بخاف من توهة زمني
بخاف ليرخص تمني
بخاف لتضيع أحلامي
اللي شايفها عروسة بطرحة
دايما أحس إن أنا وحداني
مركب ما بترساش في مواني
رحال بيدور على البر
اضحك وانا بين نفسي وبيني
حزن العالم كله ماليني
غنوة جميلة بتنزف مر
حتى في عذابي
حتى في لهيبي
أقرب صحابي
كان مين داري بي
د أنا من حبيبي
بخاف ليبعني لغيري
بخاف على حبي لطيري
بخاف ليجرح قلبي
بعد ما احب بكل ضميري
بخاف لتخون أيامي
بخاف ليخون أحلامي
بخاف لنهاية حبي
تطرح شوك وعذاب قدامي
كل ما أعد ساعات أفراحي
وأحسب ألمي وكل جراحي
أرجع في الآخر خسران
كل ما أحن لناس حبيتهم
قلبي يحس بشوق ناحيتهم
بيجمع مطرة أحزان
حتى اللي ليا
حتى اللي مني
لو حسوا بيا
لو حسوا فني
حتى أما أغني
بخاف م اللحظة الجاية
بخاف من طول لياليا
بخاف على كل حبايبي
أكتر من خوفي عليا
بخاف من حيرتي ويأسي
بخاف من روحي ونفسي
بخاف والخوف بقى دنيا
بني آدميين عايشين حوليا
كل اتنين حبيبين اتوعدوا
لازم واحد يجرح وعده
والواحد من كتر ما شاف
قربت اشك في احساسي
وصحابي وأحبابي وناسي
بقيت من كل الدنيا بخاف
حتى في كلامي حتى في غنايا
بتبان آلامي بيبان بكايا
حتى اما بفرح
بخاف …… بخاف …… بخاف